ओखलढुङ्गा – ओखलढुङ्गाको सुनकोशीमा तीर्थयात्री बोकेको बोलेरो दुर्घटना मृत्यु हुनेको संख्या चार पुगेको छ । तीनजनाको घटनास्थलमै र एकजनाको उपचारका लागि लैजाने क्रममा मृत्यु भएको हो ।
प्रदेश नम्बर ३ को ०१०२२ च ९६९४ नम्बरको बोलेरो सुनकोशी गाउँपालिका–९ को सिकारीडाँडामा सोमबार बिहान दुर्घटना भएको थियो। बलेरोमा चम्पादेवी ककनी मन्दिर दर्शन तथा एकादशी मेला भर्न जाने भक्तजन रहेको प्रहरीले जनाएको छ ।
विराटनगरस्थित १ नम्बर प्रदेश प्रहरी कार्यालयका अनुसार मृत्यु हुनेमा सिद्धिचरण नगरपालिका–१० बस्ने ३६ वर्षीया शान्तामाया मगर, ३५ वर्षीया मिठुमाया मगर, १६ वर्षीया तुलसा मगर र १९ वर्षीय खगेन्द्र मगर रहेका छन्।
घटनामा जिपमा सवार १२ जना घाइते भएकाछन्। घाइते भएका मध्ये चारजनालाई हेलिकप्टर मार्फत काठमाडौँ लगिएको जिल्ला प्रहरी कार्यालय ओखलढुंगाले जनाएको छ।
प्रहरी कार्यालयका अनुसार घाइते ३ जनाको स्वास्थ्य चौकी कटुन्जेमा उपचार भइरहेको र अन्य घाइतेहरुलाई मिशन अस्पताल लगिएको छ ।
