नेपाली कांग्रेसका वरिष्ठ नेता रामचन्द्र पौडेलले राष्ट्रपति पदको लोभमा परेको भनेर आफ्नाविरुद्ध कुप्रचार गरिएको बताएका छन्।नेपाली कांग्रेस भक्तपुरले जिल्लाका पूर्वसभापति विश्वनाथ मिश्रको १०५ औं जन्मजयन्तीको अवसरमा मंगलबार आयोजना गरेको कार्यक्रमलाई सम्बोधन गर्दै उनले प्रतिनिधिसभा विघटनविरुद्ध आन्दोलनमा उत्रँदा राष्ट्रपति हुन खोजेको भन्दै आफ्नाविरुद्ध कुप्रचार गरिएको बताएका हुन्।
लोकतन्त्रका लागि आफू सधैं लड्दै आएको भन्दै उनले प्रतिनिधिसभा विघटनविरुद्ध लोकतन्त्र र संविधानको रक्षाका लागि सडकमा निस्किएको बताए।उनले पहिलो राष्ट्रपति बन्न गरिएको प्रस्ताव अस्वीकार गरेको दाबी गरे। ‘गिरिजाबाबुलाई राष्ट्रपति बन्न दिइएन। त्यसपछि गिरिजाबाबुले तपाईं बन्नुस् भनेर प्रस्ताव गर्नुभयो। तर मैले अस्वीकार गरेँ,’ उनले भने, ‘राष्ट्रपतिको पदमा खुम्चिएर हुँदैन, मैदानमा बसेर लड्छु भनेर छाडेर हिडेको थिएँ। अहिले मेराविरुद्ध गलत प्रचार गरियो।’ पौडेलले अहिले कांग्रेसले कुनै पदको लोभ गर्न नहुने बताए।
