बुटवलबाट गैडाको खाग सहित ३ जना पक्राउ

बुटवल मंसिर २३/ रुपन्देही प्रहरीले गैंडाको खागसहित तिनजनालाई पक्राउ गरेको छ। ईलाका प्रहरी कार्यालय बुटवल रुपन्देहीबाट खटिएको प्रहरी टोलीले बुधवार दिउसो ३ बजेतिर बुटवलबाट गैंडाको खाग सहित तस्करीमा संलग्न तिनजनालाई पक्राउ गरेको हो।

प्रहरीले गैंडाको खागको कारोबार हुंदै छ भन्ने विशेष सुराकीको आधारमा बुटवल वडा नं. ५ स्थितमा रहेको हरियाली होटल एण्ड लजको चौथो तलाको ११८ नं. कोठामा बसेको बेला उनिहरुलाई पक्राउ गरेको जनाएको छ।

पक्राउ परेकाहरुमा अर्घाखाँची छत्रकोट गाउँपालिका वडा नं.७ सुर्यथुम बस्ने वर्ष ४८ को नर बहादुर सुनार, वर्ष ५८ को पदम सुनार र छत्रकोट वडा नं.५ रानीचाप बस्ने वर्ष २८ को सुमन न्यौपाने रहेका छन्।

पक्राउ परेकाहरुमध्ये सुमन न्यौपानेले लगाएको ज्याकेटमा खोजी गर्दा ज्याकेटको भित्री गोजिमा लुकाई राखेको कालो रङको ४ ईन्च गोलाई, ४ ईन्च लम्बाई भएको गंैडाको खाग फेला परेको प्रहरीले जनाएको छ।

जिल्ला प्रहरी कार्यालय रुपन्देहीका प्रवक्ता प्रहरी नायब उपरिक्षक नवरत्न पौडेलले पक्राउ परेका तिनैजना र बरामद गरिएको खागलाई थप अनुसन्धानको लागी डिभिजन वन कार्यालय भैरहवा पठाईएको बताए।

यस्तै प्रहरीले बुटवल उपमहानगरपालिका वडा नं. २ पुष्पनरसिंह टोलबाट लागुऔषध र लागु औषध कारोबारमा संलग्न एकजनालाई पक्राउ गरेको छ।

प्रहरीले बुटवल २ कै २० वर्षिय जाबेद खानलाई नुफिन २४ एम्पुल, फेनारगन २४ एम्पुल र सेरि ज्याक २४ एम्पुल सहित पक्राउ गरि आवश्यक अनुसन्धान सुरु गरिएको जनाएको छ ।