इन्डियन प्रिमियर लिग (आइपिएल) टी ट्वान्टी क्रिकेटमा समूह चरणका अन्तिम खेलहरु रोमाञ्चक अवस्थामा पुगेका छन्। मुम्बई इन्डियन्स पहिलो क्वालिफायरका लागि छनोट भएको प्रतियोगितामा तीन पटकको उपाधि विजेता र पाँच पटक फाइनलमा पराजित चेन्नई सुपर किंग्स पहिलोपटक समूह चरणबाट बाहिरियो। 
सबै टिमले समूह चरणमा अन्तिम खेल खेल्न बाँकी छ। मुम्बईसँग पहिलो क्वालिफायरमा प्रतिस्पर्धा गर्न अंक तालिकामा दोस्रो स्थानमा रहने टिमका साथै इलिमिनेटर खेलका लागि तेस्रो र चौथो स्थानमा रहने टिमको टुंगो अन्तिम खेलबाट लाग्ने भएको छ। 
जसमा रोयल च्यालेन्जर्स बैंग्लोर, दिल्ली क्यापिटल्स, सनराइजर्स हैदराबाद, किंग्स इलाभेन पञ्जाब, राजस्थान रोयल्स र कोलकाता नाइट राइडर्समध्ये तीन टिम अघि बढ्न सक्नेछन्। जसमा समान १४ अंक रहेका बैंग्लोर र दिल्ली नै अन्तिम खेल खेल्दैछन्। जसमा विजेता टिम १६ अंकसहित पहिलो क्वालिफायरमा मुम्बईसँग खेल्नेछ। 
अंक तालिकामा शीर्ष स्थानमा र दोस्रो स्थानमा रहने टिमले खेल्ने पहिलो क्वालिफायरको विजेता टिम फाइनल पुग्नेछ। पहिलो क्वालिफायरमा पराजित टिमले दोस्रो क्वालिफायर खेल्न पाउनेछ। जसमा तेस्रो र चौथो स्थानमा रहने टिमबीचको इलिमिनेटर खेलको विजेतासँग दोस्रो क्वालिफायर हुनेछ।
अब समूह चरणको अन्तिम खेलमा चेन्नई र पञ्जाब, कोलकाता र राजस्थान, दिल्ली र बैंग्लोर साथै हैदराबाद र मुम्बई खेल्नेछन्। शीर्ष स्थानको मुम्बईको १८ अंक, दोस्रो स्थानमा रहेको बैंग्लोर र तेस्रो स्थानमा रहेको दिल्लीको समान १४ अंक छ। त्यसपछि सम्भावना रहेका चार टिमको समान १२ अंक रहेको छ। यसैले तेस्रो र चौथो स्थानमा पर्न नेट रन रेटमा प्रतिस्पर्धा हुनेछ। 
कुन टिमको अवस्था के? 
किंग्स इलाभेन पञ्जाब –  अंक १२, नेट रन रेट (-०.१३३)
पञ्जाबले अन्तिम खेलमा आइतबार दिउँसो पौने ४ बजे चेन्नई सुपर किंग्ससँग प्रतिस्पर्धा गर्दैछ। १३ खेलमा १० अंक रहेको चेन्नई प्रतियोगिताबाट बाहिरिइसकेको छ। यसैले यसमा दबाब पञ्जाबमाथि नै हुनेछ। पञ्जाबका लागि चेन्नईविरुद्धको जितका साथै अगाडि बढ्न नेट रन रेटमा पनि भर पर्नुपर्ने हुन्छ। 
राजस्थान रोयल्स – अंक १२, नेट रन रेट (-०.३७७)
राजस्थान रोयल्सले अन्तिम खेलमा आइतबार बेलुका पौने ८ बजे कोलकाता नाइट राइडर्ससँग खेल्नेछ। अहिले नै खराब नेट रन रेटका कारण राजस्थानका लागि आफ्नो जितका साथै हैदराबाद र पञ्जाबले अन्तिम खेल हार्दा सहज हुनेछ। यदि हैदराबद र पञ्जाबमध्ये एक टिमले आफ्नो खेल जितेमा राजस्थान अगाडि बढ्न राम्रो नेट रन रेट आवश्यक हुनेछ। हैदराबाद र पञ्जाब दुबैले जितेमा पनि राम्रो नेट रन रेट बनाएर राजस्थान अघि बढ्ने सम्भावना भने रहन्छ नै। 
कोलकाता नाइट राइडर्स – अंक १२, नेट रन रेट (-०.४६७) 
कोलकाताले अन्तिम खेलमा आइतबार बेलुका पौने ८ बजे राजस्थान रोयल्ससँग खेल्दैछ। यसैले राजस्थान र कोलकाताको अवस्था उस्तै देखिन्छ। यसैले राजस्थानका लागि जस्तो परिस्थिति आवश्यक छ कोलकाताका लागि पनि ठीक उस्तै छ। आफ्नो जितका साथै राम्रो नेट रन रेट बनाउनुपर्ने हुन्छ। 
रोयल च्यालेन्जर्स बैंग्लोर – अंक १४, नेट रन रेट (-०.१४५) 
बैंग्लोरले समूह चरणको अन्तिम खेलमा सोमबार बेलुका पौने ८ बजे दिल्ली क्यापिटल्ससँग प्रतिस्पर्धा गर्दैछ। दुवै टिमको समान १४ अंक छ। यसैले यो खेलको विजेता टिम १६ अंकसहित अंक तालिकाको दोस्रो स्थानमा रहँदै मुम्बईसँग पहिलो क्वालिफायर खेल्नेछ। यदि बैंग्लोरले दिल्लीसँगको खेल हारेमा अरु खेलको नतिजामा भर पर्नुपर्ने हुन्छ। यदि हैदराबाद र पञ्जाबले आफ्नो खेल जितेमा बैंग्लोरको १४ अंक अघि बढ्नका लागि पर्याप्त हुने छैन। यसैले बैंग्लोरले आफ्नो खेल हारेमा हैदराबाद र पञ्जाबको अवस्थाले ठूलो अर्थ राख्नेछ। हैदराबाद र पञ्जाब दुबै हारेमा १४ अंक नै पर्याप्त हुनेछ। 
दिल्ली क्यापिटल्स – अंक १४, नेट रन रेट (-०.१५९) 
दिल्लीले आफ्ना पछिल्लो चार खेल हार्दा नेट रन रेटमा अवस्था खराब बनाएको छ। पहिलो १० खेलसम्म ०.७७४ को नेट रन रेटमा रहेको दिल्लीले पछिल्लो तीन खेलमा नै ०.९३३ ले नेट रन रेट कम गर्न पुग्यो। दिल्लीले अन्तिम खेलमा बैंग्लोरलाई जितेमा दोस्रो स्थानमा रहने पक्का हुनेछ। अन्य अवस्था बैंग्लोरको जस्तै रहेको छ। 
सनराइजर्स हैदराबाद – अंक १२, नेट रन रेट (०.५५५)
हैदराबादले अन्तिम खेलमा शीर्ष स्थानमा रहेको मुम्बईसँग मंगलबार पौने ८ बजे प्रतिस्पर्धा गर्नेछ। प्रतिस्पर्धामा रहेका अन्य टिमको तुलनामा नेट रन रेट राम्रो रहेकाले हैदराबादका लागि मुम्बईसँगको जितले अगाडिको बाटो आफ्नै भरमा हुनेछ। यो समूह चरणको अन्तिम खेल भएकाले यही नतिजामा अरु टिमको अवस्थासमेत भर पर्नेछ।